سپاٹ فکسنگ سکینڈل سے کرکٹ کا حسن تباہ ہو رہا ہے، سرفراز نواز

اسلام آباد …سابق ٹیسٹ کرکٹر سرفراز نواز نے کہا ہے کہ آئی پی ایل میں حالیہ سپاٹ فکسنگ سکینڈل سے کرکٹ کا حسن تباہ ہو رہا ہے، انٹرنیشنل کرکٹ کونسل کو چاہیے کہ وہ فوراً واقعہ کی تحقیقات کرے، اگر آئی سی سی نے اس طرح کی لیگز پر پابندی میں مزید تاخیر کی تو کرکٹ کے مستقبل کیلئے ایک بڑا خطرہ ہو گا۔ اپنے ایک بیان میں انہوں نے کہا کہ کرکٹ میں سپاٹ فکسنگ کے واقعات کی وجہ سے شائقین کرکٹ کا اس کھیل سے اعتبار اٹھ رہا ہے اور ان کی دلچسپی بھی کم ہو رہی ہے، حالیہ آئی پی ایل فائیو میں کرپشن سے کرکٹ کھیل کا امیج بری طرح متاثر ہو رہا ہے اسلئے آئی سی سی کو چاہیے کہ وہ اسکی روک تھام کیلئے کردار ادا کرے۔ انہوں نے کہا کہ پوری دنیا میں آئی پی ایل کی وجہ سے ہی سپاٹ فکسنگ عام ہوئی اگر آئی سی سی بر وقت کارروائی کرتا تو آج کرکٹ کرپشن سے مکمل طور پر پاک ہوتا۔ ان کا کہنا ہے کہ جو بھی عناصر سپاٹ فکسنگ جیسے لعنتی کام میں ملوث ہیں انہیں سخت سے سخت سزا دی جائے تاکہ آئندہ کوئی بھی اس کا رخ نہ کرے۔

Posted in: Sports